北方少女劈頭第一句又係同我講普通話。
我：你識唔識講，或者聽廣東話？
佢：識聽少少，講都識講少少。
我真心好Nice咁問：你想唔想我同你練習廣東話，等你可以廣東話有進步。
佢尷尬話：自己廣東話好差。
我：咁你想唔想用英文交談？
佢繼續尷尬嘅表情。
我轉Channel用普通話同佢講：OK，咁你可唔可以下次有禮貌地問我一聲用普通話我O唔OK ?
佢呆左1秒：上次睇隔壁的醫生我都可以用普通話。
我：你都話係上次嗰位醫生，即係唔係我。如果你簡單問我一句，我會覺得你尊重緊我。唔好第一句就用普通話，跟住覺得全世界都要遷就你。同埋我冇話唔俾你用普通話，但係我想你問下我先。可能我唔識聽，可能我唔識講呢？正如我頭先會問你一句你識唔識聽或者講廣東話一樣。
我應該等投訴信係咪？
仲有下文。
佢兩個禮拜之前皮膚敏感。而家全部好返晒，一啲病徵都冇。佢冇影低啲紅疹，就算用普通話講，佢都形容得一嚿嚿。我唯有同佢講返有啲咩特別敏感嘅嘢要注意，如果再發生可以點處理等等。我開定抗敏感藥俾佢，如果不幸地再有皮膚敏感，可以影低咗之後食藥止痕先，跟住再搵醫生睇。
Educate完之後，佢竟然問我攞病假！！病假係俾有病嘅人。佢今日冇病徵，今日冇病，點樣俾呢？我都唔同佢討論皮膚敏感係咪嚴重到你可以攞開病假嘅問題。你兩個禮拜之前有事，今日心血來潮過嚟睇醫生，問我專業意見點處理，點解我要開假紙俾你呢？
佢完全唔理解，覺得坐得入嚟我呢間房就代表係有病同埋可以攞假。
聽日就即刻有投訴信+老細又搵我傾計係咪？預咗啦。
我知會有人問，點解我俾人投訴咁多次，都仲唔學精啲，仲係咁On🐶，堅持要串D北方病人。我唔係好偉大咁想捍衛粵語。好多字我都唔識讀。我係可以就咁同佢講普通話睇完就算。但係我純粹係想被人尊重。唔想樣樣野得過且過，搞到常態化左。唔好同我講做醫生已經好多人尊重，呢句係笑話/廢話。亦都唔好同我講咁樣唔代表唔尊重我。總之我就係唔鍾意佢哋Assume其他人要識普通話。依家唔係我搬去上海/北京，所以我要學當地語言。係佢哋落嚟香港但係唔肯學我哋嘅語言。
我知再諗香港而家變成一個乜嘢地方已經冇意思。五千萬UGL、大白象、DQ議員、Harrow簡體字、梁天琦六年..... 十年已經到了。你當我自己喺度做我卑微嘅抗爭，雖然冇意思但係我真係唔鍾意咁樣呢。
我亦都知道佢哋由細路仔開始洗腦，一路溝啲新香港人落嚟，普教中，政治打壓，濫用公安條例..... 再過20年， 10年，5年係真係好Work。佢哋只不過要鬥長命，等我哋呢一代老嘅香港人逐個逐個死晒，佢哋就一定會贏嘅。
仲有其他出路嗎？
Search